Aprobación definitiva do Plan Especial de Protección das Catedrais
O 9 de xuño aprobouse o Plan Especial de Protección das Catedrais, promovido polo Concello de Ribadeo con carácter prioritario, como PE_1 do Plan Xeral de Ordenación Urbana Municipal e redactado polo equipo formado por Mario Crecente y Asociados Consultores, GAU Arquitectura e Urbanismo e o Ibader.
A aprobación definitiva do Plan Especial é froito dun traballo de cinco anos, que incorpora as prescricións derivadas da Avaliación Ambiental Estratéxica e as determinacións dos informes previos solicitados a todas as administracións implicadas, entre elas a Deputación provincial de Lugo, a Dirección Xeral de Costas do Ministerio de Agricultura e Pesca, Alimentación e Medio Ambiente e ao Administrador de Infraestruturas Ferroviarias (ADIF); así como as alegacións recibidas durante a exposición pública.
O obxectivo fundamental do Plan Especial é contribuír á preservación do patrimonio natural e cultural desta área protexida, sentando as bases para o desenvolvemento dun modelo turístico sostible, que teña en conta as necesidades de veciños e veciñas. Entre as grandes novidades están a previsión dun centro de información e atención ao visitante e a ordenación da accesibilidade, cunha decidida aposta polo ferrocarril. Ao mesmo tempo, fíxanse as medidas necesarias para manter o uso tradicional do espazo agrario, coa convicción de que estas actividades son unha garantía para a conservación dos valores naturais.
