Coordinación e seguimento da candidatura de Ribeira Sacra a Patrimonio Mundial
Desde Crecente Asociados, como coordinadores da candidatura de Ribeira Sacra a Patrimonio Mundial, continuamos a realizar un seguimento continuo do Plan de Xestión de Ribeira Sacra, composto de 35 accións, 18 departamentos responsables e un investimento no período 2020-2023 próximo aos 35 millóns de euros.
Outros instrumentos e oportunidades que xurdiron en paralelo ao Plan son un impulso para a mellora continua deste territorio e o reforzo das accións previstas. Neste sentido, cabe destacar as sinerxias co Plan de Sustentabilidade Turística Ribeira Sacra, o Plan de Sustentabilidade Turística Ourense Termal, o Pacto pola Paisaxe ou o Plan de Acción da Paisaxe. Así mesmo, o coñecemento sobre esta paisaxe cultural continúa enriquecéndose da man de novas investigacións, como a desenvolvida cos veciños do núcleo de Santo Estevo de Ribas de Sil, en Nogueira de Ramuín, respecto do Couto de Santo Estevo de Ribas de Sil, que en 2021 celebrou o seu 1100 aniversario.
Recentemente Mario Crecente deu conta destas novidades e do estado da candidatura no Foro Territorios Patrimonio, celebrado en Monforte de Lemos os días 21 e 22 de decembro.
