Incoación da declaración do Pazo de Lourizán como Ben de Interese Cultural
O pasado 10 de maio publicouse no Diario Oficial de Galicia a resolución da Dirección Xeral de Patrimonio Cultural, pola que se incoa o procedemento para declarar ben de interese cultural inmoble, na categoría de monumento, co nivel de protección integral, o Pazo de Lourizán, situado no termo municipal de Pontevedra.
Coa incoación, comeza a aplicarse de forma inmediata e provisional o réxime de protección que establece a Lei 5/2016, do 4 de maio, do patrimonio cultural de Galicia, para os bens de interese cultural. Esta boa nova ten detrás un traballo multidisciplinar para a análise, documentación e delimitación, desenvolvido por Crecente Asociados nos últimos meses de 2022.
Neste enlace podedes consultar o decreto que contén nos seus anexos 1 e 2 unha detallada descrición do ben, do seu estado de conservación, dos seus valores culturais, dos seus usos, do seu réxime de protección e da súa delimitación.